ఎమ్మెల్యే అదీప్ రాజును కలిసిన ఏపీయూడబ్ల్యూజే పరవాడ ప్రెస్ క్లబ్ సభ్యులు

ఎమ్మెల్యే అదీప్ రాజును కలిసిన ఏపీయూడబ్ల్యూజే పరవాడ ప్రెస్ క్లబ్ సభ్యులు

          పరవాడ పెన్ పవర్

పరవాడ మండలం: పెందుర్తి శాసనసభ్యులు అన్నంరెడ్డి అదీప్ రాజును ఏపీయూడబ్ల్యూజే పరవాడ ప్రెస్ క్లబ్ నూతన కార్యవర్గ సభ్యులు శుక్రవారం ఉదయం పెందుర్తి మండలం రాంపురం లో ఉన్న ఆయన స్వగృహంలో  మర్యాదపూర్వకంగా కలిశారు. ప్రెస్ క్లబ్ సంక్షేమానికి తమ వంతు సహాయ సహకారాలు అందించాలని  ప్రెస్ క్లబ్ ప్రతినిధులు ఎమ్మెల్యేను కోరారు. విలేకరుల సంక్షేమానికి తన వంతు సహాయ సహకారాలు సంపూర్ణంగా అందిస్తానని ప్రెస్ క్లబ్ సభ్యులకు ఎమ్మెల్యే ఈ సందర్భంగా హామీ ఇచ్చారు. ఈ కార్యక్రమంలో ఏపీయూడబ్ల్యూజే జిల్లా కమిటీ కార్యవర్గ సభ్యులు రవి,  ప్రెస్ క్లబ్ గౌరవ అధ్యక్షులు పైల సన్యాసిరావు, అధ్యక్ష,కార్యదర్శులు చిరికి లోకేష్, విశ్వనాధం, ఉపాధ్యక్షులు పల్లి శ్రీనివాసురావు, సహాయ కార్యదర్శి కుండ్రపు సోమునాయుడు, కోశాధికారి సిహెచ్. అనిల్ కుమార్, కార్యవర్గ సభ్యులు శ్యామ్, సిహెచ్ గోపి, బొండా గోపీనాథ్, ,జగదీష్, కరణం అప్పారావు( నర్సింగ్),ఎలక్ట్రానిక్ మీడియా అధ్యక్షులు బొండా నాని, కార్యదర్శి శివాజీ, ప్రెస్ క్లబ్ సభ్యులు చందు, రమేష్, నాగరాజు, రవి, గొల్లవిల్లి సురేష్, కోరుకొండ శ్రీను, తదితరులు ఎమ్మెల్యే ను కలిసిన వారిలో ఉన్నారు.

ఎదురుకాల్పుల్లో నలుగురు మావోయిస్టులు హతం

ఎదురుకాల్పుల్లో 
నలుగురు మావోయిస్టులు హతం

ఒడిస్సా ఎన్ కౌంటర్ నేపథ్యంలో అప్రమత్తమైన ఆంధ్రా పోలీసులు
గాయపడ్డా మావోల కోసం జల్లెడ పడుతున్న పోలీసులు
ప్రతీకార చర్యకు మావోయిస్టుల ఎదురు చూపు.
నివురు కప్పి న నిప్పుల మన్యం
ఏజెన్సీలో ముమ్మరంగా తనిఖీ లు.

చింతపల్లి /విశాఖపట్నం_బ్యూరో (  పెన్ పవర్)

మన్యం నివురు కప్పిన నిప్పుల మారింది. ఏక్షణంలో ఎటువైపు నుంచి తూటా సౌండ్ వినిపిస్తుందో? పోలీస్ మావోయిస్టు ల మద్య ఏ మారణ హోమానికి తెర తీస్తుందో నన్న భయంతో గిరిజనులు హడలి పోతున్నారు. ఏఓబి లో గత వారం రోజులుగా ఉద్రిక్తత నెలకొంది. ఒడిస్సాలోని కంధమాల్ జిల్లా,తమిడి బంధ పోలీస్ స్టేషన్ పరిధి సిర్లా అటవీ ప్రాంతంలో గత వారంలో ఒడిసా పోలీసులకు, మావోయిస్టులకు జరిగిన ఎదురు కాల్పుల్లో నలుగురు మావోలు మృతి చెందిన నేపథ్యంలో ఆంధ్రా పోలీసులు అప్రమత్తమయ్యారు. గత కొంతకాలంగా ఏఓబి సరిహద్దు ప్రాంతాలతో పాటు ఒడిస్సా అటవీ ప్రాంతాలలో మావోల కదలికలు ఉదృతంగా కొనసాగుతున్న నేపథ్యంలో  ఇటు ఆంధ్రాలో అటు ఒడిస్సాలో గాలింపు చర్యలు ముమ్మరం చేశారు. ఒడిస్సా లో జరిగిన  ఎదురుకాల్పుల్లో మావోలు మృతి చెందడమే కాకుండా మరికొంత మంది మావోలు తీవ్ర గాయాలతో తప్పించుకున్నట్టు ఒడిస్సా పోలీసులు  భావిస్తున్నారు. మావోయిస్టులకు భారీ ఎదురుదెబ్బతగిలిన నేపథ్యంలో వారు సురక్షిత ప్రాంతమైన  ఏఓబి సరిహద్దు ప్రాంతాలకు తరలి వచ్చే అవకాశం ఉందంటూ పోలీసు నిఘా వర్గాల హెచ్చరికలతో ఏపీ పోలీసులు అప్రమత్త మయ్యారు. దీంతో ఏవోబీ సరిహద్దుల్లో భారీగా పోలీసులు ముమ్మర గాలింపు చర్యలు చేపట్టారు. ఏవోబి పరిధిలో ఉన్న అన్ని పోలీస్ స్టేషన్లు అప్రమత్తమయ్యాయి.  గాలింపు చర్యలు ఉదృతం చేశారు. దీంతో ఏవోబీలో ఉద్రిక్త  వాతావరణం నెలకొంది. ఏవోబీలో ఏ క్షణాన ఏం జరుగుతుందోనని మన్యం వాసులు భీతిల్లుతున్నారు. పోలీసుల చర్యలతో మావోయిస్టులకు ఎటువంటి నష్టం వాటిల్లినా దాని ప్రభావం ఏఓబి సరిహద్దు గిరిజన గ్రామాలపై పడుతుంది. దీంతో   ఏఓబీ లోని గిరిజనులు బిక్కుబిక్కుమంటూ కాలం వెళ్లదీస్తున్నారు. ఏవోబీ అటవీ ప్రాంతాన్ని పోలీస్ బలగాలు జల్లెడ పడుతున్నాయి. ఏజెన్సీ వ్యాప్తంగా పోలీసులు గట్టి నిఘా ఏర్పాటు చేశారు. ప్రధాన కూడళ్లలో వాహన తనిఖీలు నిర్వహిస్తున్నారు. అపరిచితులను, అనుమానితులను ప్రశ్నించి విడిచి పెడుతున్నారు.

లష్కరే ఉగ్రవాది అరెస్ట్.. గ్రేనేడ్లు, బుల్లెట్లు స్వాధీనం..

లష్కరే ఉగ్రవాది అరెస్ట్.. గ్రేనేడ్లు, బుల్లెట్లు స్వాధీనం..

జమ్ముకశ్మీర్‌లో ఉగ్రవాదుల ఏరివేత కొనసాగుతోంది. నిత్యం కశ్మీర్‌ లోయలో భద్రతా బలగాలు ఉగ్రవాదుల కోసం జల్లెడ పడుతున్నారు. ఈ క్రమంలో పలువురు ఉగ్రవాదులతో పాటు.. సానుభూతిపరులను అరెస్ట్ చేస్తున్నారు. తాజాగా బందిపొరా జిల్లాలోని హాజిన్‌ పట్టణం హక్బారా ప్రాంతంలో ఉగ్రవాదులు ఉన్నారన్న పక్కా సమాచారం అందడంతో.. జమ్ముకశ్మీర్ పోలీసులు, రాష్ట్రీయ రైఫిల్స్‌, 45 బెటాలియన్‌ సీఆర్పీఎఫ్‌ జవాన్లు కూంబింగ్ చేపట్టారు. ఈ క్రమంలో లష్కరే తోయిబా ఉగ్ర సంస్థకు చెందిన రఫీఖ్ అహ్మద్‌ అనే ఓ ఉగ్రవాది భద్రతా బలగాలపై గ్రేనేడ్‌ విసరబోయాడు. ఇది గమనించిన జవాన్లు.. వెంటనే అప్రమత్తమై.. అతడిని చాకచక్యంగా అరెస్ట్ చేశారు. ఆ ఉగ్రవాదిని తనిఖీ చేయగా.. అతడి వద్ద రెండు లైవ్ హ్యాండ్‌ గ్రేనేడ్లు, 19 రౌండ్ల బుల్లెట్లు (ఏకే-47కు చెందినవి) గుర్తించారు. ఇతడు ఇటీవలే లష్కరే సంస్థలో చేరినట్లు విచారణలో తేలింది. అయితే అతడికి గ్రేనేడ్లు ఇచ్చి.. సైన్యంపై విసరమని ఉగ్రవాద సంస్థకు చెందిన టాప్‌ టెర్రరిస్టులు టార్గెట్‌ ఇచ్చారని తెలిసింది. ఘటనపై కేసు నమోదు చేసుకున్న హజీన్‌ పోలీసులు దర్యాప్తు చేపడుతున్నారు. పట్టుబడ్డ ఉగ్రవాదిపై పలు సెక్షన్ల కింద కేసులు నమోదు చేసి అరెస్ట్ చేశారు. గ్రేనేడ్లు, బుల్లెట్లను సీజ్ చేశారు.

సర్కారీ దవాఖానాలో బెడ్లు లేవు.. ప్రయివేటుకు సొమ్ము లేదు.. కరోనా పేషెంట్ల ఇక్కట్లు!

సర్కారీ దవాఖానాలో బెడ్లు లేవు.. ప్రయివేటుకు సొమ్ము లేదు.. కరోనా పేషెంట్ల ఇక్కట్లు!

 ప్రైవేటు ఆస్పత్రుల్లో బెడ్ల కొరత.. ప్రభుత్వాస్పత్రిలో వసతుల లేమి.. కరోనా రోగుల పాలిట శాపంగా మారాయి. లక్షణాలు లేని కరోనా వ్యాధిగ్రస్తులను హోం క్వారంటైన్‌కు పంపిస్తుండగా.. లక్షణాలున్న పేషెంట్ల పరిస్థితి అగమ్యగోచరంగా మారింది. సర్కారీ ఆస్పత్రుల్లో ఆశించిన మేర చికిత్స దొరకని వారంతా ప్రైవేటు బాట పడుతున్నారు. అయితే ప్రస్తుతం హైదరాబాద్‌లో కరోనా చికిత్సలకు అనుమతులున్న 18 ప్రైవేటు ఆస్పత్రుల్లో ఎక్కడా బెడ్లు ఖాళీగా లేవు. దీంతో రోగుల్లో తీవ్ర ఆందోళన వ్యక్తమవుతోంది. పై స్థాయిలో ఉన్న వ్యక్తుల రికమండేషన్‌ ఉంటేనే బెడ్లు దొరికే అవకాశం ఉండటంతో.. సాధారణ పేషెంట్ల పరిస్థితి నరకంలా మారింది. ప్రస్తుతం ప్రైవేటు ఆస్పత్రుల్లో ఒక్కో బెడ్‌కు 8 మంది వెయిటింగ్‌ లిస్ట్‌ ఉందంటే పరిస్థితి తీవ్రతను అర్థం చేసుకోవచ్చు. ఒకవేళ బెడ్ దొరికినా.. పీపీఈ కిట్స్‌ అని, మెడిసిన్ అని.. లేదా వెంటిలెటర్‌ అంటూ లక్షల్లో చార్జీలు దండుకుంటున్నాయి.. కొన్ని ప్రైవేటు ఆస్పత్రులు. హైదరాబాద్‌లో ప్రస్తుతం 11 ప్రభుత్వ ల్యాబ్‌లలో టెస్టులు చేస్తున్నప్పటికీ.. సామాన్యుడుకి ఇబ్బందులు తప్పడం లేదు. ప్రస్తుతం కొవిడ్ పరీక్ష చేయాలంటే.. ఒక రోజు వచ్చి టోకెన్ తీసుకోవాలి. ఆ తర్వాత పరీక్ష కోసం ఏకంగా రెండు రోజుల పాటు లైన్‌లో నిలబడాల్సిన దుస్తితి ఉంది. కేవలం పరీక్షలకే మూడు రోజులు సమయం పట్టగా.. రిపోర్ట్ రావడానికి ఏకంగా 6 రోజులు పడుంతోంది. దీంతో లక్షణాలు ఉన్నవారిలో తీవ్ర ఆందోళన వ్యక్తమవుతోంది. చికిత్స తీసుకుందామనకుంటే రిపోర్ట్‌ లేకపోవడంతో ఎక్కడా చేర్చుకోవడం లేదు. ప్రతీ పరీక్షా కేంద్రంలో రోజూ 250 వరకు పరీక్షలు చేసే సామర్థ్యం ఉన్నా.. రికమెండేషన్‌లతోనే సగం పరీక్షలు పూర్తవుతున్నాయని.. రోగులు ఆగ్రహం వ్యక్తం చేస్తున్నారు. ప్రస్తుతం కరోన పాజిటివ్ కేసుల్లో.. 80 శాతం లక్షణాలు లేని కేసులు మాత్రమే వస్తుండడంతో.. ప్రభుత్వ క్వారంటైన్ గా ముందు నుంచీ ఉన్న నేచర్ క్యూర్ హస్పిటల్ లో.. వందలాది మంది రోగులు కోలుకొని ఇంటికి వెళ్తున్నారు. 300 బెడ్స్ సౌకర్యం ఉన్న ఈ ఆస్పత్రి.. యాక్టీవ్ కేసులతో పాటు.. డిశ్చార్జీలతో నిత్యం రద్దీగా కనిపిస్తోంది.

మాజీ మంత్రి పీఎస్ అరెస్ట్‌

మాజీ మంత్రి పీఎస్ అరెస్ట్‌

ఏపీలో సంచలనం సృష్టించిన ఈఎస్ఐ కుంభకోణంలో ఏసీబీ మరింత దూకుడు పెంచింది. ఇప్ప‌టికే మాజీ మంత్రి అచ్చెనాయుడు స‌హా ప‌ది మంది ఈ కేసులో అరెస్టైన విష‌యం అందరికి తెలిసిందే. తాజాగా ఏసీబీ అధికారులు మ‌రొక‌రిని అరెస్ట్ చేసినట్టు తెలుస్తోంది. టీడీపీ సీనియర్ నాయకుడు, మాజీ మంత్రి పితాని స‌త్య‌నారాయ‌ణ వ‌ద్ద‌ పీఎస్‌గా ప‌నిచేసిన ముర‌ళీ మోహ‌న్ అనే వ్య‌క్తిని అదుపులోకి తీసుకున్నారు. అతన్ని ఆంధ్రసప్రదేశ్ స‌చివాల‌యంలో వద్ద ఏసీబీ అధికారులు అరెస్ట్ చేశారు. ముర‌ళీ మోహ‌న్ ప్ర‌స్తుతం స‌చివాలయంలోని మున్సిప‌ల్ అడ్మినిస్ట్రేష‌న్ విభాగంలలో విధులు నిర్వ‌హిస్తున్నారు. దీంతో ఈఎస్ఐ కుంభకోణం కేసులు అరెస్టుల సంఖ్య 11 కు చేరింది. టీడీపీ ప్ర‌భుత్వ హ‌యాంలో మొదట కింజరాపు అచ్చెనాయుడు ఆ త‌ర్వాత పితాని స‌త్య‌నారాయ‌ణ కార్మిక శాఖ మంత్రిగా ప‌ని చేశారు. ఇదిలావుంటే ఈ కేసులో అరెస్టయి జైల్లో ఉన్న అచ్చెన్నాయుడు సహా నిందితులందరి బెయిలు పిటిషన్లను ఇటీవల కొట్టివేస్తూ ఏసీబీ కోర్టు గ‌త శుక్రవారం ఉత్తర్వులు జారీ చేసింది. ఇక ఈ స్కామ్‌ను విజిలెన్స్ అండ్ ఎన్‌ఫోర్స్‌మెంట్ బయటపెట్టిన సంగతి తెలిసిందే.. అధికారులు చెబుతున్న దాని ప్రకారం గత ఆరేళ్లలో రూ.కోట్ల కుంభకోణానికి పాల్పడ్డారని నిర్ధారించారు. ఈఎస్‌ఐ లేని కంపెనీలు నుంచి నకిలీ కొటేషన్లు తీసుకుని ఆర్డర్లు ఇచ్చినట్లు తేలింది.

క‌రోనా టెస్టుల్లో ఏపీ స‌ర్కార్ దూకుడు..15 నిమిషాల్లోనే ఫలితాలు..

క‌రోనా టెస్టుల్లో ఏపీ స‌ర్కార్ దూకుడు..15 నిమిషాల్లోనే ఫలితాలు..

క‌రోనా టెస్టుల విష‌యంలో ఇప్ప‌టికే దూసుకుపోతున్న ఏపీ ప్ర‌భుత్వం మ‌రింత జోరు పెంచింది. ఎమ‌ర్జెన్సీ ట్రీట్మెంట్ కోసం వ‌చ్చినవారు క‌రోనా టెస్ట్ ఫ‌లితం కోసం ఎక్కువ స‌మ‌యం వెయిట్ చేయాల్సిన పనిలేదు. కేవ‌లం 10 నుంచి 15 నిమిషాల్లోనే టెస్టుల రిపోర్ట్ తెలుసుకునేలా స‌ర్కార్ చ‌ర్య‌లు చేప‌ట్టింది. ఈ క్ర‌మంలో కోవిడ్‌- 19 ర్యాపిడ్‌ యాంటిజెన్‌ టెస్ట్‌ కిట్‌లను ప్ర‌వేశ‌పెట్టింది. ఈ కిట్‌లోని స్వాబ్‌తో తొలుత‌ ముక్కులో నుంచి జిగురును టెస్టు కోసం తీస్తారు. దానిని కిట్‌లోని లిక్విడ్‌లో మూడుసార్లు తిప్పి, ఆ స్వాబ్‌కు అతుక్కున్న మూడు చుక్కల ద్రవాన్ని కిట్‌పై వేస్తారు. 15 నిమిషాల త‌ర్వాత రిజ‌ల్ట్ తెలుస్తోంది. కిట్‌పై క‌ల‌ర్ మారితే కరోనా సోకిన‌ట్లు నిర్ధారిస్తారు. గ‌వ‌ర్న‌మెంట్ ఆస్ప‌త్రుల‌కు ఎమర్జెన్సీ వైద్యం కోసం వచ్చే రోగులకు, యాక్సిడెంట్స్, ప్రసవాల చికిత్స కోసం వచ్చిన వారికి ఈ టెస్టులు చేయ‌నున్నారు. దీనికి సంబంధించి రాష్ట్రవ్యాప్తంగా కిట్లు పంపిణీ చేశారు. అలాగే ఫ‌స్ట్ ఫేజ్ లో కర్నూలు జిల్లాకు 1,900 కిట్లు పంపారు. వీటిని కర్నూలు పెద్దాసుపత్రి, ఆదోని మాతాశిశు కేంద్రం, నంద్యాల జిల్లా ఆసుపత్రితో పాటు జిల్లాలోని 18 కమ్యూనిటి హెల్త్‌ సెంటర్లకు పంపారు. గురువారం నుంచే ఈ కిట్ల ద్వారా ఎమ‌ర్జెన్సీ రోగులకు టెస్టులు నిర్వహిస్తున్నారు. ఒకవేళ రోగికి క‌రోనా సింట‌మ్స్ ఉండి, అతనికి నెగిటివ్ అని వ‌చ్చినా మళ్లీ ఆ వ్యక్తికి ఆర్‌టీపీసీఆర్ టెస్ట్ చేస్తారు.

కారు బోల్తాప‌డలేదు.. అది ఎన్‌కౌంటరూ కాదు..

 

కారు బోల్తాప‌డలేదు.. 
అది ఎన్‌కౌంటరూ కాదు.. 

యోగి స‌ర్కార్‌పై ప్ర‌శ్న‌ల తూటా
దూబే ద్వారా రహస్యాలు బయటపడితే ప్రభుత్వం బోల్తా 
అందుకే ఈ చర్యలు తీసుకున్నారు: అఖిలేశ్
దూబేకు సహకరించిన వారి సంగతేంటి?: ప్రియాంకా గాంధీ
చనిపోయిన వ్యక్తి ఎలాంటి కథలు చెప్పలేడు కదా: ఒమర్ అబ్దుల్లా

 

గ్యాంగ్‌స్ట‌ర్ వికాస్ దుబే భ‌య‌ప‌డిందే జ‌రిగింది. ప్రాణ‌భ‌యంతో స్వ‌యంగా పోలీసుల‌కు ప‌ట్టుబ‌డిన‌ వికాస్ దుబే.. చివ‌రికి త‌న చావును తానే కొనితెచ్చుకున్న‌ట్ట‌యింది. పోలీసుల నుంచి త‌ప్పించుకుని పారిపోతూ వికాస్ దుబే హ‌తమ‌య్యాడ‌న్న ‌వార్త విని కా‌న్పూర్ వాసులు పండ‌గ చేసుకుంటున్నారు. ముఖ్యంగా ఇటీవ‌ల వికాస్‌దుబే చేతిలో చ‌నిపోయిన పోలీసు కుటుంబాలు.. త‌మ‌కు అస‌లైన న్యాయం ఇప్పుడే జ‌రిగిందంటూ హ‌ర్షం వ్య‌క్తం చేస్తున్నాయి.

మ‌రోవైపు ఇదే స‌మ‌యంలో వికాస్ దుబే ఎన్‌కౌంట‌ర్‌పై విమ‌ర్శ‌లు కూడా మొద‌ల‌య్యాయి. వికాస్ దుబేది ఫేక్ ఎన్‌కౌంట‌ర్ అంటూ.. విపక్షాలు యోగి స‌ర్కార్‌ను టార్గెట్ చేశాయి. వికాస్ దుబే ఎన్‌కౌంట‌ర్‌పై న్యాయ విచార‌ణ జ‌ర‌పాల‌ని డిమాండ్ చేస్తున్నాయి. స‌మాజ్‌వాదీ పార్టీ అధ్యక్షుడుఅఖిలేష్ యాద‌వ్.. వికాస్ దుబే పేరు ప్ర‌స్తావించ‌కుండా యూపీ స‌ర్కార్‌పై తీవ్ర విమ‌ర్శ‌లు చేశారు. కారు బోల్తాప‌డ‌లేదు కానీ.. కాని ర‌హ‌స్యాలు బ‌య‌ట‌కు రాకుండా జాగ్ర‌త్త‌ప‌డి.. ప్ర‌భుత్వం బోల్తాప‌డ‌కుండా చూసుకోగ‌లిగింది అంటూ ట్విట్ట‌ర్ వేదిక‌గా మండిప‌డ్డారు. క్రిమిన‌ల్‌ని చంపారు స‌రే..ఇన్నాళ్లు అత‌ని నేరాల‌కు స‌హ‌క‌రించిన‌వారు, కాపాడిన వారి సంగ‌తేంట‌ని కాంగ్రెస్ నేత ప్రియాంక గాంధీ కూడా ట్విట్ట‌ర్ వేదిక‌గా యూపీ స‌ర్కార్‌ను ప్ర‌శ్నించారు. నేష‌న‌ల్ కాన్ఫ‌రెన్స్ నేత ఒమ‌ర్ అబ్దులా .. వికాస్ దుబే ఎన్‌కౌంట‌ర్‌పై పోలీసులు చేసిన ప్ర‌క‌ట‌న‌పై సెటైర్ వేశారు. మ‌ర‌ణించిన‌వారు క‌థ‌లు చెప్ప‌లేరు అంటూ ఆయ‌న కామెంట్ చేశారు. ఇదిలా ఉంటే ఇటీవ‌లే యూపీలో జ‌రిగేవ‌న్నీ ఫేక్‌ ఎన్‌కౌంట‌ర్లేన‌ని.. వాటిపై విచార‌ణ జ‌రిపించాలంటూ సుప్రీం కోర్టులో పిటిష‌న్ కూడా దాఖ‌లైంది. ఈ క్ర‌మంలోనే వికాస్‌దుబే ఎన్‌కౌంట‌ర్ కూడా జ‌ర‌గ‌డం చ‌ర్చ‌నీయాంశంగా మారింది.