మున్సిపాలిటీలో ' రింగ్ ' తిప్పుతున్న స్వతంత్రులు

 మున్సిపాలిటీలో ' రింగ్ ' తిప్పుతున్న స్వతంత్రులు

- 1, 2, 3 వార్డులలో స్వతంత్రుల హవా

నర్సీపట్నం, పెన్ పవర్ :

మున్సిపాలిటీ ఎన్నికలలో 1, 2, 3 వార్డులలో స్వతంత్ర అభ్యర్ధులు ఆదిపత్యాన్ని ప్రదర్సిస్తున్నారు.  ప్రధానపార్టీల అభ్యర్ధులు కన్నా ప్రచారంలో దూసుకుపోతున్నారు. ఒకటికి రెండుసార్లు ఇంటింటికీ తిరుగుతూ ఓటర్లను అభ్యర్ధిస్తున్నారు. 1, 2 వార్డులలో మాకిరెడ్డి అప్పారావు దంపతులు పోటీ చేస్తుండగా, 3 వ వార్డులో  మామిడి శ్రీనివాసరావు తన సోదరి చెక్కా బాలమ్మను పోటీలో ఉంచారు. శ్రీనివాసరావు సతీమణి అరుణకుమారి సిట్టింగ్ కౌన్సిలర్. అయినప్పటికీ నామినేషన్ సమయంలో కులదృవీకరణ పత్రం పై అభ్యంతరాలు రావడంతో నామినేషన్ తిరస్కరించారు.  దీంతో శ్రీనివాసరావు తన సోదరిని పోటీలో ఉంచారు.  అయితే మాకిరెడ్డి అప్పారావు,  మామిడి శ్రీనివాసరావు ఇద్దరూ చింతకాయల సన్యాసిపాత్రుడు అనుచరులే. చివరి వరకు బి-ఫారంలు ఆశించి స్వతంత్రులుగా బరిలో నిలవాల్సి వచ్చింది. 1, 2 వార్డులలో మాకిరెడ్డి అప్పారావు, విజయకుమారి దంపతులు తమదైన శైలిలో ప్రచారాన్ని నిర్వహిస్తున్నారు.  అప్పారావు గత ఐదు సంవత్సరాలుగా రెండు వార్డుల్లో సొంత నిధులతో అనేక సంక్షేమ చేస్తూ వచ్చారు.  రెండు వార్డులలో ఎవరి ఇంట్లో పెళ్లి జరిగినా, వధువుకు బంగారు శతమానం, పట్టు బట్టలు, పసుపు కుంకుమ ఇవ్వడం సాంప్రదాయంగా పెట్టుకున్నాడు. అంతేకాకుండా వార్డులో ఎవరు మృతి చెందిన దహన సంస్కారాలు తానే దగ్గరుండి చేయించడం,  ప్రభుత్వం ఇచ్చే సంక్షేమ పథకాల్లో అవకతవకలు జరిగితే బాధితులకు అండగా నిలవడం, ఇలా ఏ కష్టం వచ్చినా ప్రజలకు అండగా ఉంటూ, ఆయా కుటుంబాల్లో  ఒకడిగా పేరు తెచ్చుకున్నాడు.  కరోనా లాక్ డౌన్ సమయంలో ప్రజలకు కూరగాయలు, నిత్యవసర సరుకులు అందించేందుకు మిగతా నాయకులకు స్పూర్తిని ఇచ్చింది కూడా అప్పారావే. దీంతో  పార్టీతో సంబంధం లేకుండా ఆ వార్డులో ప్రజలు మాకిరెడ్డి దంపతులకు నీరాజనాలు అందిస్తున్నారు. అదేవిధంగా మూడో వార్డు లో మామిడి శ్రీనివాసరావు భార్య, సిట్టింగ్ కౌన్సిలర్ మామిడి అరుణ తన హయాంలో ఎన్నో అభివృద్ధి కార్యక్రమాలు చేపట్టారు.  ఇకముందు నిరుద్యోగ యువతీ యువకులకు ఎస్సీ కార్పొరేషన్ నుండి రుణ సదుపాయం కల్పించారు. ప్రజల కష్టసుఖాల్లో పాలు పంచుకుంటూ మంచి పేరు సంపాదించుకున్నారు. అయితే అనూహ్యంగా ఆమె  నామినేషన్ తిరస్కరింపబడడంతో చెక్కా బాలమ్మ పోటీలో ఉన్నారు. అయితే ఎలక్షన్ కమీషన్  ఉంగరం గుర్తు కేటాయించిన సమయం నుండి, ఆగుర్తును  ప్రజల్లోకి తీసుకెళ్లేందుకు తీవ్రంగా శ్రమించారు.  మొత్తం మీద మూడు వార్డులలో ఉంగరం గుర్తు పై స్వతంత్ర అభ్యర్థులు, ప్రధాన పార్టీలపై ఆధిపత్యం ప్రదర్శిస్తున్నారు.